top of page
Search

Mamamoo 嘅華莎係公認屬性相當秋天嘅藝人,加上佢 post 上 Instagram 嘅相大多數係秋天嘅衣着搭配同妝容,所以好值得屬於 Autumn 嘅你作參考!

此外因為佢著黑色同黑髮比較好睇,而佢本身都係健康膚色,所以比較偏向 Dark Autumn 。提提大家要特別注意唔係所有健康膚色嘅人都係屬於秋天,例如之前講嘅 (G)I-DLE 嘅 Minnie 就係 Bright Winter !

圖1: 因為華莎經常係 Valentino fashion show 嘅坐上客,而嗰一季嘅 Valentino 全個系列只有 shocking pink ,所以華莎就著咗鮮艷嘅粉紅色出席活動,依套連身裙係深嘅桃紅色,已經係算比較適合佢,佢著過一套係好似佢對襪嘅鮮粉紅,就會更加搶 focus ,第一眼會俾佢對襪吸引而唔係佢本人!

右圖就係超級適合佢嘅咖啡色,氣場同高級感都滿分,秋天屬於嘅你就係唔需要太複雜嘅打扮就已經做到氣質🈵🈵



圖2: 純白色(漂白)和純黑色都係屬於冬天嘅顏色,而因為華莎膚色較深加上 Dark Autumn 屬性,所以比起白色,佢更適合黑色,同樣係簡單款式嘅晚裝,但黑色亦更切合佢嘅女皇氣勢🖤



圖3: 正因為純白色屬於冬天,所以漂白色喺華莎身上會好突出;而秋天屬性要選白色就要選沙色,如少少濁嘅米色會令穿搭更加柔和高級,加上大地色嘅老花手袋,可以令 effortless 嘅 outfit 加上亮點!



圖4: 左右兩張圖雖然都係化咗華莎適合嘅秋天妝容,但左圖佢染咗一個深藍色頭髮,整個人都較無氣息,而藍色髮色亦會與華莎格格不入;

右圖配合柔和大地色嘅眼影和胭脂,加上啞面唇色,就算係著普通 t-shirt 整個人都元氣滿滿,顯得氣息好好。



圖5: 左圖整個妝感都帶 blue based ,淡桃粉紅彩妝,加上飽和度比較高 cool tone 嘅 blouse 搶 focus ,令華莎有點顯蒼白;右圖淡淡然嘅灰粉紅,比較會喺瑜伽服出現嘅顏色,就同華莎更融洽,即使上衣只不過係普通嘅運動服,都比左圖更有高級感!



圖6: 雖然英倫風 Burberry 格係好適合 Autumn ,但華莎配咗一個紅色手袋同紅唇,令整個造型對比度太強,秋天屬性不適合太多唔同顏色喺身上;右圖嘅 monotone 嘅穿搭和妝容更能突顯 Autumn 嘅氣質!



圖7: 有客人會問咁 Autumn 係咪唔可以濃妝豔抹,其實又唔一定,華莎一向妝容都唔算太淡,但佢唔可以太多顏色同時喺身上或臉上,例如唇膏顏色可以揀偏磚紅好過正紅,飽和度亦唔可以太高,即使係偏歐美妝,有濃密睫毛同深眼線,但眼影、胭脂、唇膏都要偏大地色,整體妝容先會事半功倍🤎



圖8: 左圖同樣係低飽和度嘅穿搭,但灰拼牛仔會偏 cool tone ,所以放喺華莎身上就有點平平淡淡;當佢著番啱佢嘅大地色系,即刻令人眼前一亮,更明艷照人!



圖9: 左圖又係正紅色唇膏,再加螢光粉紅背心,令到造型出事;另外有一些適合暖色系嘅人只可以用 yellow based ,所以比較不適合穿上牛仔單品,如果都係秋天屬性但又揾唔到啱嘅牛仔衫褲,可以嘗試加咗 vintage 洗水效果的,應該同你更合襯。



圖10: 左圖係彩度太高嘅藍色,加上絲絨令面質地,即使華莎自帶氣場,但都著唔出華麗感覺;而比起藍色系,秋天屬性更適合帶紅調嘅顏色,如粉紅色都係不錯嘅選擇,但切記不要選擇彩到太高嘅 shocking pink,右圖淡淡然嘅粉紅色,加上同色系深淺搭配嘅 pattern,令整體造型有氣勢之餘亦加點少女味!🆙

Comments


bottom of page